ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន នឹងបរិច្ចាគប្រាក់ដែលបានពីការទទួលមេដាយមាសសន្ដិភាពដែលសម្ដេចបាននៅព្រឹកនេះទៅកសាងផ្ទះជូនអតីតយុទ្ធជន។
កាលពីព្រឹកនេះ មហាសន្និបាតនៃក្ដីសង្ឃឹមបានប្រគល់មេដាយមាសសន្ដិភាពពិភពលោកជូនសម្ដេចតេជោ ហ៊ុន សែន ដោយសម្ដេចបានដើរតួនាទីយ៉ាងសំខាន់ក្នុងការជួយឱ្យឧបទ្វីបកូរ៉េ និងពិភពលោកមានសន្ដិភាព។
ថ្លែងនៅពហុកីឡដ្ឋានមរតកតេជោនារសៀលនេះ សម្ដេចនាយករដ្ឋមន្ត្រី មានប្រសាសន៍ថា មេដាយដែលសម្ដេចទទួលបានមានភ្ជាប់មកជាមួយនូវប្រាក់រង្វាន់ចំនួន ១លានដុល្លារអាមេរិក ដែលសម្ដេចតេជោ ថានឹងយកប្រាក់ទាំងនេះទៅកសាងផ្ទះជូនអតីតយុទ្ធជនរស់នៅ។
សម្ដេចតេជោមានប្រសាសន៍ថា៖ « ព្រោះផ្ទះមួយ ៣ទៅ ៤ពាន់ដុល្លារ អាចធ្វើបានច្រើនដែរ។ ព្រោះប្រពន្ធខ្ញុំធ្វើបានច្រើនហើយ ឥឡូវខ្ញុំត្រូវធ្វើប្រជែងនឹងប្រពន្ធខ្ញុំ » ។
បើគិតក្នុងតម្លៃមួយផ្ទះ ៤ពាន់ដុល្លារ ដូច្នេះក្នុងទឹកប្រាក់ ១លានដុល្លារ សម្ដេចតេជោអាចសង់ផ្ទះជូនអតីតយុទ្ធជនបានចំនួន ២៥០ខ្នងផ្ទះ៕
